Unha persoa cómbase, agachando a cabeza e flexionando o tronco; o resto colócase en fila, de fronte a esa persoa. O/a primeiro/a, á vez que salta dirá unha frase e fará un determinado tipo de movemento coas partes do seu corpo. As frases e as accións serán:

• Á unha, saltar a mula (saltar pousando só as mans).

• Ás dúas, salto e pégoche un couce (saltar dándolle cun pé no cu).

• Ás tres, a Cruz de San Andrés (saltar e caer coas pernas abertas e brazos en cruz).

• Ás catro, cuada que te parto (saltar e dar co cu no lombo do/da que apanda).

• Ás cinco, maior ou menor brinco (saltar atrás ou diante do que indique a persoa que eva o xogo).

• Ás seis, “meis” (saltar, beliscando no lombo).

• Ás sete, cachete (saltar, dando unha palmada no cu a quen apanda).

• Ás oito, pan viño e biscoito (saltar, dar co pé no cu e cuada no lombo).

• Ás nove, abre o paraugas que chove (saltar, facendo que abrimos un paraugas).

• Ás dez, estatuas unha e outra vez (saltar e quedar estáticos/as, sen tocarse entre sí).

Material : Taponciños de refrescos
Espazo: Terreo no chan no que se dibuxa un camiño con ou sen atrancos


Participan un máximo de seis xogadores e bótase sortes para ver que comeza. As chapas lánzanse dándolles un golpiño coas unllas para avanzar polo camiño que está marcado no chan.

Dependendo das idades, podemos realizar diferentes actividades coas chapas:

• Os/as máis pequenos/as terán que pasar un camiño marcado no chan en forma de serpe (se alguén se sae do camiño non terá que volver ao principio).

• Para os/as medianiños/as, estreitaremos o camiño (se alguén se sae do camiño terá que volver ao principio).

• Para os/as máis grandes, colocaremos obstáculos no camiño (cárcere, pozo, areas movedizas, morte…); que caia nalgún destes obstáculos pasará unha, dúas, tres veces sen tirar ou mesmo volverá escomezar o xogo (se cae na morte, que será o peor dos atrancos).